تخيل نفسك بخيل
على ماتطلع الجنيه
تفكر تفكير طوييييييل
وتطلعه وترقد جنبيه
زعلان حزين هزيل
وتعيط وتقول موواويل
وحياتك تتقلب عويل
وجه صاحب جميل
وقالك الناس بتقول عنك بخيل
وأنا صراحة شايف البخل أكرم منك ..بس ماتخفش إنت فيك خير
واتفق معاك
تصرف من جيبه ولو معاك
وكل ماتطلع من فلوسك تلاقيه واقف وراك
مادد إيده بفلوسه يداري عيوبك لحد ما البخل نساك
وإنت لسة بخيل بس بسببه الناس شايفاك ملاك
وكل دة على حساب نفسه ولا عمره بكلمة آذاك
ولو اتحرجت من عميله معاك
هو عمره ماينساك
وكل ماتتهرب منه وتقرر ترجع لأحوالك
تلاقيه هو ناداك
يقولك خد كل إللي معايا أنا كل مالي فداك
تخيل نفسك نكد وممل
كل ما الناس تجيب في سيرتك
تقول:يووووه دة يشل
دة على الدموع بيدور وللأحزان بيحن
وتلاقيه هو باله بيك مشغول
يألف في حاجات مضحكة ويقولهم دة هو إللي بيقول
ويحكي مواقف تهلك من الضحك ويقول عنك مش معقول
ويتمحي تقل دمك من العقول
وإنت معاه كئيب ووشك عامل زي الغول
لكن هو صابر ومستني إنه بكرة ينول
والأيام أهي بتفوت
ونفسه يشوفك مرة بتضحك قبل ما يموت
والله في ناس كدة
مش كتير بس موجودين أنا متأكدة
ناس بتضحي وبتستحمل
إلي إنت نفسك ماتطيقهوش
ولو فيك عيب تدرايه عنك
وتخلي الناس متشوفهوش
وتكون هي عارفة بلاوي
ويفضل سر ماتطلعهوش
وتصلحك وتعدلك
وإنت تسهى ومتشكرهوش
ويفضل جنبك ..حد جميل بيحبك
وإنت تقصيرك مابيرحمهوش
لو عندك صاحب كدة متسبهوش
دة كإنه مراية
تطلعك زي القمر..وإنت معفن ومنكوووش
يا رب من رحمتك متمنعهوش
ومن رؤيتك متحرمهوش
وتخليه ليا وعني متبعدهووووش.
بقلم: مي جميل
ليست هناك تعليقات:
إرسال تعليق