عايزين نتغير

عمرك مرة أذنبتي ذنب وروحتي حكيتي لأمك أو صحبتك أو أختك أو باباكي أو أي حد قريب ليكي وحسيتي بعديها إنك مرتاحة أوي؟؟ أو حد من كل دول شافك في معصية وخلاكي بعد كدة تبأي عايزة تسمعيه لما تذنبي عشان هو فعلا بيعرف يتعامل معاكي صح؟طب عمرك مرة حد جه حكالك إنه أذنب أو شوفتيه على خطأ ونصحتيه فمتهربش منك وبدأ مايجيش في الأماكن إللي إنت فيها...ويعمل نفسه أوف على الماسنجر لما تفتحي أويعملك ديليت من على الفيس أو لما يحكي حاجة لحد يقوله ما تقولش لفلانة عشان حتديني محاضرة؟؟؟؟؟عارفين ليه كل دة بيحصل..عشان إحنا خلينا الرسول تاريخ وألهنا الصحابة وعشان كل كلامنا عن الرسول كدة:غزوة بدر سنة كذا وكان الرسول يقاتل قوم فلان ومات سنة كذا وكل كلامنا عن الصحابة فعل الصحابي فلان رضي الله عنه كذا وكان مش عارف مين بيقرأ القرآن إزاي...وكان الصحابي فلان يتصدق بنصف ماله ويسبقه فلان فيتصدق بماله كله

ليه لما بنذنب ذنب مش بندور الصحابة عملوه ولا لأ....وليه لما حد بيحكيلك أو بتشوفيه على معصية مش بتبصي الرسول كان بيتعامل معاهم إزاي؟؟طب ححكي موقف وبجد أنا لما سمعته من الأستاذ أحمد الشقيري وأصل الفكرة دي كلها من محاضرة اسمها لو كان بيننا عشان بس الأمانة كنت بجد متنحة:واسمحولي أحكي الموقف بالعامية عشان بس تحسوه:بيحكي عبد الله بن العباس إن أخوه الفضل بن العباس كان في الحج مع الرسول صلى الله عليه وسلم وقاعد جنبه،ومرت من جنبهم إمرأة جميلة وكان الفضل بن العباس جميييل فبيقول بالنص:فظل ينظر إليها وظلت تنظر إليه!!!!!!!!!!!!!!!!!!!!!!!!!!

مين إللي عمل كدة؟؟؟؟ صحابي

ومين جنبه؟؟؟؟؟؟؟؟الرسول وبيعمل كدة إمتى؟؟؟؟؟؟؟في الحج

وفين ؟؟؟؟؟في الحرم المكي

نكمل القصة ...فبيقول أخوه عبد الله إن الرسول شافه وهو بيبص للمرأة والمرأة تبصله فقعد الرسول يبص عليه فالصحابي يتكسف ويدير وشه وبعدين لما الرسول يرجع نظره يقوم الصحابي يرجع يبص تاني لحد ما الرسول حط إيده الشريفة أدام عينيه.

تخيلوا كدة لو الرسول كان قاله:إيه إللي إنت بتعمله دة ؟ مش عيب وإننت قاعد جنب الرسول تعمل كدة؟كان ممكن يقوم يقعد بعيد ويفضل طالق بصره ...لكن مش الموضوع إنك تقولي لحد عمل معصية إللي إنت بتعمليه دة حراااااااااااام لإن غالبا إحنا والصحابي دة عارفين الغلط من الصح ... الفكرة إني مش عايزاها فعلا تعمل الغلط لا وأنا معاها ولا وأنا مش معاها.... الفكرة إزاي أبأة معين لحد إنه يوصل لربنا...كان ممكن الرسول من أول مرة شافه بيبص على المرأة دي شخط فيه وغضب منه وقال حديث عن غض البصر نفضل نردده ليومنا دةل,كل واحد بيطلق بصره لكن الرسول عليه الصلاة والسلام صبر عليه وبصله مرة والتانية واتعامل معاه صح بدليل إن الصحابي فاضل قاعد جنبه وأخطأ تاني وغير كدة يا جماعة الصحابة دول بشر ...مفيش ذنب بنعمله إلا وفي حاجة على وزنه اتعملت أيام الرسول فمايجيش حد يقولك اقتدي بالصحابي فلان فتردي وتقولي يا شيخة دول صحابة بجد المواقف كتير ومن نعم ربنا علينا بجد إن الرسول عليه الصلاة والسلام أكثر شخصية كتب في سيرتها وأكتر شخصية حكي عنها.....وإحنا بججد اتظلمنا وظلمنا ...اتظلمنا لما أخدنا الرسول وسيرته في الإسلام على إنه تاريخ وغزوات وكم عدد من قتل من الصحابة....يهمني في إيه أنا كطفلة في ابتدائي إن عددهم كذا وسنة الغزوة كانت كذا ومات سنة كذا ...حد فينا يوم ما أخد في المدرسة وتوفى الرسول عليه الصلاة والسلام سنة كذا من الهجرة عيط أو حتى حزن..لكن إللي سمعوها من عمرو خالد في على خطى الحبيب أو من طارق السويدان و في إحدى الدروس في المسجد بكوا وعيطوا كإنهم لسة عارفين إنه مات دلوقتي.....وظلمنا نفسنا عشان مادورناش عليه...ما دورناش نعرفه وبجد نعمة إن رسولنا هو محمد عليه الصلاة والسلام نعمة كبيرة إنتو مش متخيلنها, نعمة عشان سهل أقتدي بيه إحنا نعرف محمد عليه الصلاة والسلام الداعي لله

ومحمد الأب مع أولاده

ومحمد الزوج مع زوجاته

ومحمد الصديق الحميم مع أبي بكر الصديق

ومحمد الصديق مع أصحابه

ومحمد عليه الصلاة والسلام العابد حين يعبد ربه

ومحمد عليه الصلاة والسلام القائد العظيم

ومحمد عليه الصلاة والسلام المحارب

نقدر ندور ونعرف سيرته ومواقفه كلها مع الصحابة من يوم مولده مش بس لحد مماته دة لحد موقفه معانا يوم القيامة وشفاعته لينا ووقفته معانا على الحوض

يعني تخيلوا لو كنا من أمة عيسى عليه السلام....نعرف إيه إحنا عن سيدنا عيسى غير قصته مع قومه ومعجزاته

طولت بس بجد نفسي كل حد ياخد باله من النقطة دي إن إحنا عندنا حاجة نعرف نرجعلها في كل مواقفنا وإن إحنا ،مش لازم نرجع لورا عشان نعرف الرسول إحنا ممكن نجيب لو الرسول كان معانا في سنة 2009الفكرة

مقتبسة من محاضرة لو كان بيننا للأستاذ أحمد الشقيري وحقوق النشر غير محفوظة بالمرة لمن أراد نسخ الفكرة أو الإضافة عليها أو تغييرها من كلام إلى شعر أو من أراد إرسالها لأي إنسان بل يا ريت كلنا نوصل الفكرة دي